Stephy,

我係直女,但識識下識左好多Gay仔朋友,又覺得佢地都好好,我諗我已經係fag-hag,卦。但有件事,真係好心痛,又唔知可以同咩人講,可以點講。上期見到你地有個Gay仔廣告。唔知件事如果可以登出黎,會唔會有多D人可以諗下呢樣野。

有晚同一個唔熟既Gay仔朋友MSN,chatchat下好唔對路,佢自己無錢又讀緊書,但又勁講要搬出去住。咁我嘗試開解佢,但唔成功。之後,佢開個WebCam俾我睇……

鏡頭入面,一個背鏡既女人(佢媽)一路狂鬧個仔中意男人,一路拎住把肉刀,好近距離指住佢個仔!佢每一下指埋去,都好似真係要斬埋去!就係咁,我隔住MSN,隔住個Web Cam,白白睇住成個過程……好驚,好嬲,好心酸……個 gay friend 就好軟弱無力咁坐係原位,同佢媽媽講D理性既說話,好似想理性論討咁。但佢媽媽,唔使我講……

然後Gay仔朋友偷偷地打字問我:
咁我仲點可以係度住…?

點解會咁,點解可以咁!但係,作為朋友,我乜野都做唔到……究竟點解會有D咁既事發生。

Sarah

 

XXXXXXXXXXXXXXXXXXXXXXXXXXXXXXXXXXXXXXXXXXXXXXXX

 

Sarah,
平日答問題心態都係吹下水,交流下je,不過今次唔一樣,媽媽對自己個仔係同性戀的終極恐懼、你朋友被迫選擇離家的絕望,同埋你睇住個mon不知所措的焦慮,呢d時候真係無咩辦法……你都可以提醒佢必要時可以去庇護中心住,好似明愛向晴軒,不過呢d地方多數都係比較偏重女性受害者,佢去到可能會覺得唔自在,但始終都係唔好傷害到彼此最重要。

細d o個陣,我同個TB拍過施,雖則係好短頭髮、打籃球、著男仔衫、特登去銅鑼灣某鋪頭買tb背心,但同佢相處,親密就會發覺,佢都有所謂好女仔/好可愛的地方。

因為「望落唔知似咩」,佢都同佢屋企人成日嘈,佢爸媽會對佢的衣著指指點點,佢一剪髮就縐晒眉,佢失戀搞到無心讀書o既時候又單單打打……到佢high dip讀金融經濟,intern著suit,佢父母就好似守得雲開,又叫佢唔好再「搞d咩」。不過,就算佢唔係les,都無咩唔同,佢屋企人都係會要佢去搵錢,放假留係屋企會睇唔過眼,覺得你要有錢途,都係o個d呀爸呀媽。

另外一個男仔fd係異性戀者,成日同屋企人嘈完走出街就打黎俾我訴苦,而家係中大住宿,番屋企就更加少。他鍾意d諗野科,哲學呀數學呀心理學呀,全部都無黎實際,成日做義工,佢阿媽一日鬧到黑。其實爸媽到底有冇好好地望清楚,理解清楚自己仔女係點o既人呢?我望落就好似好好,爸媽好錫我,但其實只係我讀書叻,公開試考得好又拎左d錢,如果唔係,可能都係一樣咁現實。

但係我又覺得,我父母同佢地父母都係愛仔女o既,假如勉強放進呂大樂框架去睇,佢地都係覺得要保障仔女日後生活,想佢地行一條自己見過人地成功o既路je,咪je係香港先前懶繁榮o既金融世界。家長都會好心做懷事,哇如果做野地方俾人發現你係基佬基婆,仲唔俾人歧視,前途盡毀?

不過要去到你朋友個媽媽咁極端,應該仲有其他原因驅使掛,個社會咁封閉,你睇下而家淫審諮詢,仍然好似將青少年擺係玻璃樽咁,好似咩都可以荼毒青少年咁,色情性慾彷如洪水猛獸。又或者你朋友屋企組織,佢媽媽成長過程之中,有一d事情令佢地更對基民反感都未定,我諗佢媽媽應該都唔會真係想傷害自己個仔o既。

而家部部notebook都裝曬webcam,咩都可以俾人睇到,太陽底下無新事,差在我地承唔承認見到o既係事實,佢俾得你睇,起碼都仲有可以相信的朋友,希望你可以疏導下佢d情緒,佢又可以同呀媽溝通好d啦。

Stephy

註:
直女:異性戀女性,間或稱作異女
fag-hag:原解作「喜好與死基佬搞野的異性戀核突女人」,現常理解為「喜歡與男同性戀者做朋友的女生」。

分享至:

Leave a Reply

Your email address will not be published.