校園︳誠徵諮詢委員會學生代表

文：早洩 

做學生代表有咩用?

有咩用？你咪以為中大不嬲都黑箱作業，我地就任人魚肉。其實係過去曾經有不少學生代表在各個諮詢委員會不斷發聲，監察委員會，使我地或工友既利益不受校方侵害。學生代表有權知道委員會預想推行的措施，並且為同學發表意見，亦可以將校方的資料透露俾不同渠道，就好似我地學生報，將一Ｄ同學有權知既嘢傳播出去。無錯！學生代表係同學既線人，將校方消息收集番黎並且將一Ｄ會損害同學同工友利益既決策爆出黎。

學生代表一個都不能少

做圖書館讀書小組既學生代表，就經歷過烽火台事件。呢位學生代表，就係喺開會個陣，知道圖書館將會擴建既提案。礙於篇幅所限，不能詳細表述。重點係：有學生代表先有機會知道校方既新措施，即使佢地想卸膊都無機。就好似劉遵義喺零八年十一月十八日聲稱「學生代表在圖書館小組會議上亦沒有表示異議」，好明顯係講大話。因為嗰名學生代表表示，曾經兩次問校方會唔會公開諮詢，更有會議紀錄作證。換言之，如果我地無學生代表，校方就可以為所欲為，bypass向同學諮詢的過程，從而使其奸計得逞。所以有學生代表係一件至關重要既事。

做人一定要大聲，做學生代表都係

淨係有學生代表都唔夠，做學生代表一定要為同學和工友發聲。你咪以為淨係喺個諮詢委員會度得個坐字；或者以為諮詢啫，都無實權，做唔到嘢，咁就大錯特錯喇。

做過校園學生交通服務諮詢小組（下稱交諮）既學生代表，就講過一件幾富趣味而又有啟發性既事件。話說以前（而家都可能係）成日開空車，唔載人，浪費資源。學生代表有見及此，就喺交諮提出呢個問題。與會既交通組人員否認有咁既事，個學生代表火都嚟，就直接請交通組人員落校巴站睇下實際情況。結果當然係交通組理虧，當堂無地自容。之後空車情況果然有所改善。

其實大聲背後有理據支持，唔係無理取鬧。但需知唔係你有理人地就受你，d高層坐喺office太耐與世隔絕，又或者坐住諗唔到嘢，明明有問題當無問題，或者對人地問出既意見不瞅不睬。做學生代表有時會火滾，尤其是見到d大腦便秘既校方人員。但只要據理力爭，原來無可能既事都可以成真。

每個諮詢委員會都有唔同職能，以下筆者就簡介其他諮詢委員會。

1. 范克廉樓膳堂管理委員會
膳委主要就係睇番d canteen加價情況、菜單等等。比較有趣的是你可以向膳委提下改菜單，將你中意既菜式加落去，例如coffee corn多左炒蛋好似都係膳委度搞。最近亦曾經諮詢過canteen職員薪酬，抗議低過最低工資等等。

2. 師生中心服務單位管理委員會
呢個委員會非常重要，原因係佢負責所有喺范克廉、Fulton、李慧珍既商業單位，好似銀行、百佳、女工、髮廊、書店等。佢會傾同邊間簽約，女工的存亡亦係由呢個委員會主宰。

點樣先可以做學生代表？

其實想做學生代表好簡單，只要你睇實mass-mail，喺三月就會有學生會通知話招請學生代表。到時只要填表，講下你既抱負等等。又或者中大個網頁，都有所有諮詢委員會既職責講解。如果你有heart有火有不滿，對校政有睇法，又唔介意花少少時間，就為你同你既同學去馬做學生代表啦！