Chrissie信箱 情色, 10年11月號 Chrissie: 我發現自己可能喜歡女性。我之所以意識到這個取向,是因為每次看到女性都有想擁抱她們的慾望,甚至有更進一步的想法,如與她們親吻和發生性行為等。當我和女性有身體接觸時,那一絲的快感令我想一直都保持這種親密的距離,反而面對異性時就沒有太大感覺。 問題是我是一名基督徒。基督教禁止同性之間發生性行為、出現性幻想等。那在神眼中是不潔的,心存污穢的慾念是撒旦在心中的表現。因此每當我不自覺地存在這一類幻想或感覺時都會有悔疚、不潔的感覺。每次出現這種情況我都會藉祈禱安靜自己的心靈,希望去除這些慾望。但是週而復始的狀況令我變得討厭自己,覺得始終沒有被潔淨過。 其實我只是希望和她一起分享每個時刻,第一時間知道這個人在做什麼、在哪裡、和誰人一起等,想在她開心的時候陪在她身邊分享,在她傷心的時候在她身邊安慰,在她發脾氣的時候為她抒發憤怒……當她依靠我時,我會有一種被需要的自豪感,想進一步保護她,不想她受到傷害。其實我看重的是兩人有一種相知相惜的感覺,所謂的慾望只是希望和她可以更了解對方以及和對方發展更親密的關係。我和她的關係之中有沒有性的存在於我而言不是重點…… 但單是感覺和傾向上有愛上女性的意圖,都足以令我感到和神有所偏離。 阿田 阿田, 多謝你嘅來信呀!你都好清楚自己諗咩丫,Chrissie好欣賞你咁坦白。 其實望住自己鐘意嘅人有呢啲感覺,甚至係性幻想,都好正常呀。有時望住唔識嘅人都可以諗一大餐啦,何況係自己鐘意嘅人呢,梗係想有親密行為啦。我哋唔係神,只係普通人,普通人都有七情六慾,真係好正常。如果係咁意諗下都唔得,成件事係幾咁恐怖呀,少少幻想嘅空間都冇。 我有朋友都好似你咁,明知自己鐘意同性,但教會又話咁係錯嘅,搞到好鬼辛苦。我唔係好熟宗教,所以特登搵書睇下基督教點講同性戀。我睇果本書叫《香港同志平權報告》,有篇文都幾impress我,意思大概係話規條同立場並唔係宗教嘅終極關懷,更重要嘅係弟兄姊妹互相接納同相愛。條文好視乎社會背景同教會點詮釋,每個地方每個教會都可能唔同。正如篇文所講,聖經或者神最終極嘅目標,都係想教徒一視同仁咁去關愛其他人,點解我哋唔試下宏觀啲從呢個方向去諗下呢?同埋你對鐘意嘅人產生嘅慾望,其實都係出於好意嘛,係良善嘅表現,亦都符合終極關懷,同撒旦似乎有啲距離。你應該係中大學生?我聽朋友提過基督徒學生運動,話佢哋解釋神對同性戀嘅態度同一般教會唔同,你可以去聽下,可能會有唔同嘅睇法。 你最後話著重兩個人相知相惜嘅感覺多過性關係,我明白你想強調愛嘅感覺。不過性係咪毫不重要呢?應該唔係掛?如果唔係點解我哋咁易有性幻想丫,係咪?講愛嘅時候,唔一定要否決性架。傳統理解性係愛嘅延伸,其實性都可以獨立咁嚟睇,享受純粹的歡愉。愛同性可以互相依存,又可以獨當一面。唔洗咁快向性SAY NO喎。Chrissie知道叫你完全忠於自己嘅感覺係好難,但至少唔好咁快就否定、夾硬禁住自己嘅感覺。 Chrissie 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 5 × 六 = Δ