飯堂阿姐看大家樂

文：米莎娜美

回歸校園，又有多少同學知道中大飯堂的員工狀況？飯堂阿姐們又是如何看飯鐘錢呢樣野？本報特意訪問了兩位於飯堂工作的女工，米莎（化名）和娜美（化名）。

十一時半，米莎坐在我對面，嘗試在15分鐘內吃完那碟飯。「老闆無講明嘅，但聽啲同事話我做part time淨係可以食15分鐘，全職先可以食半個鐘。」佢呢份工返咗個幾月，每日做7個鐘，中間只有15分鐘食飯時間。「係食飯時間黎咋，無休息時間架。」米莎一再強調食飯唔等於休息，顯然她不會認同「食飯唔係做緊野所以唔洗比人工」的邏輯。

「唔計飯鐘錢真係好唔合理。由朝做到黑，唔食飯邊有力做野啫。食飯唔計錢，唔通返工去小便的時間都唔計錢咩！」米莎笑言。如果老闆突然不給飯鐘錢，她會選擇轉工。「都無聽過會食飯唔計錢咁樣嘅，做得唔開心咪唔做囉。」

在另一間canteen做part time的娜美算是比較幸運，有30分鐘有薪用膳時間。談起大家樂時，娜美「不予置評」：「我都唔係知得好多單野，唔敢講太多意見，驚講錯嘛……」娜美再三表示「自己唔係好識講野」，但當問到她自身面對的處境時，娜美就滔滔不絕起來。

「如果老闆真係扣起飯鐘錢，我會無奈接受。」娜美說「而家經濟困難，老細有老細嘅艱難，員工有員工嘅艱難。」咁點解仲會繼續做嘅？「40幾歲人仲邊有咁易轉到工呀？不過而家就算係年青人，學識低嘅都係好慘。」娜美形容這是一個「表面風光，但實際生活好艱苦」的年代，最大問題唔係無工開，而係物價高漲。如果無左飯鐘錢，娜美會「依度慳啲果度慳啲」，但就唔會反對或者去爭取，「講多都係無用架啦，好似而家政府唔理你草根嘅聲音咁啫，聽左就算。」