【情色】報社仝人自首︰ 點解情色版做到咁頹？

秘密
總編輯︰林慧嫻

我地莊期情色版做得頹，唔知選民／讀者點諗……係，又係我地衰，前排同莊員講過不如搞讀者會，最後不了了之。參選果陣熱情滿溢，當選後有不少頹位。諗起呢個時空嘅代議士，唔知有幾多個好似我咁？人，唉。

講個秘密你知：想當初，我非常落力拉票。好記得有晚響shaw校巴站，有個女仔行埋黎好認真問我：「點解要做情色版？」我答左政綱寫嘅野，可能見我答得核突，隔籬莊有人幫我補多幾句。個女仔走左之後我就話：「其實我未真切感受到做情色嘅必要。」一開始我就話不如唔好做情色版，但最後佢都係繼續存在，而且係具有正當性地存在。

開初我無掂情色版，因為無乜經驗又視之為禁忌。後尾feel到呢種性禁忌尤其對女仔造成壓力，好多女仔睇過AV又唔敢認自己睇過，就連拎包M巾出黎都極之忌諱。我知仲有其他群體受害，但我未能真切地身同感受呢……總之覺得繼續沉默都無補於事，發起茅就寫過一篇交換經驗同情色小說－十月號的〈不辨她或他〉，我好鍾意呢篇嘅內容ｘ形式，不過都唔算犯禁。老實講我到依家都仲係幾保守的，當然我會話自己條底線係具有正當性。未諗得清楚，我嘅保守算唔算有份參與營造性壓迫嘅氛圍。

不過有點我諗得清楚嘅係：理應重新思考所謂社會常識同道德規範於人本身／人際間能否起正面、良性嘅作用。做任何野唔係要服膺主流或權威，雖然咁樣係最安全，但容易對主流權威以外嘅人造成直接／間接嘅壓迫。當然人生在世有責，但要搞清楚負責對象，要為自己、為同你相關、受你牽連嘅人負責。就係咁。

所以借呢個機會，同當初俾我熱情感染而投票嘅選民、睇開學生報嘅讀者道歉。

就像哲學
副總編輯︰蕭浩恩

讀了兩年多哲學，我很認同讀哲學的一條座右銘：哲學不應是一種象牙塔內的玩意，哲學應該扣連我們的生命，啟迪我們的人生。就像做情色版一樣。

情色版的理念是甚麼？就是講一堆人家不敢講的東西－情慾，因為情慾不應成為一種禁忌，反而更應得到公眾的廣泛討論。跟哲學同理，做情色版不應只是泛泛而談，談完以為自己衝破了某些規條就算，我們更要關注情色版的實踐面向－究竟講情慾如何啟迪我們的生命？

為了將情色版的理念帶入生命之中－即是在日常生活中實踐情慾－我已經花去了很多時間，愛不止要講，還要做的。結果反過來就沒時間做情色版了。

最後唔知點樣埋尾，我好冧我女朋友，多謝各位。

點解情色版做得咁頹?
秘書︰林紀善

活於社會，大概都很難離得開社會的影響。而社會的影響，好像很難一時三刻就毫不費力地改變。

所以，雖然道理上說得到給自己聽為什麼要做情色版，但其實習慣上、感覺上都不是太願意去做情色版。

這樣的話說起來也還真是挺諷刺的：我們一開始在政綱說什麼希望情色版可以做到讓大家「重新認識及發展自己的多元情慾面向，並從中學習與他人相處」，但身為編輯的我，其實並沒有努力地認識及發展自己的情慾，結果情色版也就做不好，達不到初衷。

這個版面如此丟荒了一年，真是相當糟糕的事情:(。

我真係冇咩經驗呢
執行編輯︰郭英東

Defensive一點地說，其實我是偷偷地踩過界，將情色版的內容搬到生活版呢（可參考〈食色性也〉）。為何會這樣做呢？因為我在想，性就是生活的一部份，無須刻意地將性框在情色版裡面丫，所以便將心思轉移到在生活版裡構思色情的情節，而非專在情色版大造文章。我都算有做嘢架。（極無恥地笑）

較認真而且老實一點地說，其實我是失去了經營情色版的動力。這是我經常存在的毛病，在腦裡留下一大堆問題，自己不去積極地解決，也很少跟其他編輯分享這些問題。而我對於情色版的問題，是來自Michel Foucault的History of Sexuality《性史》的第8頁，「我這本書提出的問題不是問『為何我們被壓抑了性』，而是問『為何我們現在這樣強烈地要去講我們被壓抑了性』」，即是說，為何我要那麼在意自己的性被壓抑了而且不斷地去講這種狀態？我生產的論述想要製造一種怎麼的效果？至今我仍未想到答案，但我還會繼續去看和試做，I mean 做文章。

最後，我真的沒甚麼性經驗。曾經幻想過上莊後，一眾編輯、職員及老鬼會在報社進行大雜交，但最後都沒有發生到，可惜可惜，哈哈。

總會有人出來啃吧……
財政︰鄧權偉

雖然政綱中講到天花龍鳳，要提供一個讓大家討論性的地方，擴闊大家對情慾的想像，但回首這一年的情色版，卻是……不堪回首。

在各個版面中，最易頹皮的應該是情色版。其他版面無咁易頹，因為就算如何沒有經驗，找到資料就可以寫文。例如之前寫的可口可樂，我對南美洲裝瓶工廠工人的慘況完全沒有認識，但睇料後可以補充自己經驗的不足。但情色版與其他版面不同之處，是需要自己親身經歷過，才能有靈感想到寫甚麼，睇料的幫助是有限的。而我對性沒有甚麼經驗，而且又不擅長描述情慾、感覺，所以不知有甚麼可寫。

但除了情慾以外，我們還有其他東西值得寫，例如因對情慾的想像與主流社會不符而受壓迫的人，我們可以寫這些，而這部分就算沒有甚麼個人經驗也可以寫到。但這部分因為無努力搵料，這部分也做得不好，而這部分是較容易做的。

由於自己拋不出甚麼好的idea，所以沒有資格說其他莊員做得不好。大家都抱着同樣的心態，於是乎當有人願意出來啃了這版時，只要不過不失就會讓它出街。

但是寫得不好看，總比甚麼也不寫強。歸根究柢，做得不好很主要是因為自己太懶惰了。

世界上最遙遠的距離不是生與死，而是……
執行編輯︰劉志翔

最初我地做情色版，不過係想講：我地需要重拾身體的感覺，讓我們一同正視身體嘅情感與慾望。但老實講，無論我地頹唔頹做，你都唔會透過睇情色版而捕捉到情慾實踐當下嘅感覺，亦唔會感受到自我作為身體本身的各種微妙反應。所以，唯有願意將情慾落實於生活之中，我們才能真正把握自己的身體，這才是情色版應做的事。簡單Ｄ講，寫作不過係手段，實踐先至係目的。其實，真正的情慾感受，就只有身體的在場才可能被呈現，而唔能夠被對象化，被回憶、想象以至書寫。

情色版嘅意義就係讓佢繼續存在，這就足夠了。

連解釋其實都很頹
副總編輯︰陸明敏

首先，多謝拎住本學生報（有心或無意地）揭到去情色版呢一頁而且睇到呢一句說話嘅你。或者你真係咁岩得咁橋揭到黎，又或者其實你係情色版嘅忠實fans，每期都淨係睇情色版。但係都想講句，對唔住，其實情色版做得好撚頹。

身邊有唔少有睇開情色版嘅朋友都會問，喂，情色版到喉唔到唔到肺，咁頹仲做黎做乜？但係「頹」其實唔單止係達唔到讀者嘅期望，同時亦係冇好好咁講出我地想講嘅野，想讀者知道嘅野。（都get唔到你地想表達乜，咪就係一堆人圍威喂咋嘛！）

一開始果陣記得莊員都冇乜意欲想做情色版，個人堅持要做，其中一個好大嘅原因係出自某種反抗嘅心理：點解響社會上性冇被認真討論過就話唔好就唔比講？究竟邊到唔好？反覆諗過下、睇過下啲書就發覺其實性同我地嘅身體、慾望有好關係，既然咁貼身點解大家唔可以開心見誠咁拎出黎認真傾下？點解要比人控制我地對於慾望、身體嘅發言權？於是，情色版作為一個討論性（也即有關個人身體、慾望）嘅空間就誕生了。

開頭做的幾期情色版都有交換經驗的環節，希望可以同大家分享下性對於其他人黎講係作為點樣嘅一回事，可以有啲對於情慾上嘅交流。可惜期期諗分享啲乜都ｒ爆頭：冇乜經驗嘅人（例如我……）又進入唔到個場域，有經驗嘅人又唔係太想坦誠相對，唔想進入；亦都因為大家冇乜心進入，結果又唔係好有心ｒ人寫，結果頹做，後來情色版更成為可有可無（？）嘅版面……（未完待續）

能夠重拾質感嗎？
資料主任︰譚焜

一開始當情色版作為一種姿態或者講係態度，呢點係比較清晰嘅，可能亦係對自己過往最常聽到嘅一句「呢啲野，唔好講啦」，作出微弱的反抗。但上咗莊真係要落手做果陣，就發覺有好多窒礙寫作嘅地方，除咗所謂冇經驗，或者係始終未敢完全打開心扉，去分享情感同身體嘅事之外，我諗最主要「頹」嘅原因，就係未有能力用文字或圖像去表達一種立體同具質感嘅情色，不管當情色係身體感受也好、情感也好、還是視作經驗也好，都未有能力駕馭，十分遺憾。

即使自己係上期寫過情色產業嘅討論，似乎都走唔出平面或者學術嘅限制，始終限制喺封閉嘅場域中，過往可能出現是竊竊私語嘅場合，依家只係變成紙張上。以前同學之間講下黃色笑話，而家唔少朋友睇情色版睇到「笑騎騎」。

若果真係要檢討的話，我諗自己喺情色版最想做到嘅野，並唔係要單方面將一啲情色相關的訊息帶比讀者，係希望讀者睇完之後會對自身生活上嘅情色部份有所回饋，能夠把握更多值得愉悅的質感，而呢種質感並不是來自睇成人電影或者乜野J圖，而係來自每個人自身不同的觸感、體驗、氣味等等的質感，亦係超越「比或唔比」、「應該或唔應該」等等道德規範的身體質感。

答案最主要是集體懶惰
編輯主任（職員）：羅奕媚

這個懶惰唔係話想寫少啲文，而係懶得打開自己，懶得overcome自己的怕醜，懶得實踐一開頭響政綱寫出黎既情色版理念。社會、校園、生活，呢啲對大家黎講全部都好易寫，就算寫得唔好，都唔會話坐響度你眼望我眼，但情色版就經常發生呢件事。藉口不外乎冇經驗、冇諗法或「我專寫社會版架乍」，之類。

情色版事件打後，年年學生報編輯都決定繼續開情色版，但可謂越做越頹（包括本人當編輯的時候），做情色版接近變成只擺姿態。我相信大家都係真心認同自己所講嘅價值，但上莊前傾做乜版面時，通常只有一兩個人insist要做，到上莊做的時候，只要果一兩個人收皮（經常發生），個版就會跟住收，今屆尤其如此。

其實今屆中間都有好過的，就係做「交換經驗」，有啲編輯終於試下放下身段一點，書寫自己的經驗。但好景不常，寫幾期之後就搞唔掂，因為可想及的題目已是「門檻太高」，沒有甚麼人有經驗，而我地又嚴重缺乏新意，結果「交換經驗」就變成一篇篇嘅微小說，把自己拉出文章。最後，終覺得寫「小說集」實在冇意思，就放棄了……

不過老老實實，我細個都係咁defensive的，不過做衰左都是要認的。

作為職員，冇力挽狂瀾，絕對難辭其疚，在此表示萬分抱歉！