對於同學，宿舍是……

逸夫書院宿生  阿水（雙主修）

大學宿舍來年增加宿費，難免對一眾貧苦宿生造成經濟壓力。就此，我們特意邀約住在逸夫書院宿舍，修讀某雙主修課程的阿水(化名)做訪問。

自付宿費，身心俱疲

阿水住在屯門的公共屋村，全家總收入僅有大約一萬，扣除日常開支便已所剩無幾。他申請的學生資助僅夠繳交學費，宿費只能靠政府借貸先行繳交。為了支付宿費和生活費，被逼在課餘時間兼職補習，變相少了玩樂和溫書的時間。阿水嘆氣道：「一星期要返四日工，總共要做大約十四個鐘，加埋來回車程，都差唔多用左廿個鐘。」加上面對雙主修需要處理兩方面的知識，同時兼顧工作和學業令他精神壓力很大。「上完一日堂，返工返到夜晚十一點幾，返到宿安頓好都已經一點幾，溫埋書同做功課差唔多要三、四點先有得瞓。」

住宿是唯一的緩衝辦法

對於需要花上近二十元車費、一小時以上車程才能回校的阿水來說，住宿無疑幫了他很多。「上堂同返工的地方都遠離屯門，太夜放工會無車返屋企。」阿水嘆道：「即使有車返到屋企，返到去都已經好夜，根本無時間去做功課溫書。第二朝又要一早起身趕返學，不但無得好似住宿咁食早餐，搭長途車加上繁忙時間逼地鐵亦消耗好多精力，令到上堂時精神狀態又會差很多，就似無左靈魂咁，教授講書好多時都聽唔入耳。」

比起每天乘車來回學校、補習社與住所，阿水認為住在宿舍好太多，「同時返學又要返工其實已經好攰，放工之後已經想即時瞓覺。住宿起碼可以令我精神狀態好啲，最緊要係可以慳返啲時間同車錢，慳左既時間又可以用黎溫書。」

在溫書和睡覺以外

雖然阿水留在宿舍的時間大多以溫書和睡覺為主，但他偶然也會參加宿舍舉辦的活動，「有時會同宿友一齊去參加宿生會搞既活動，又會去下院慶千人宴。」他亦認為住宿可以學習與人相處和擴闊社交圈子。「正所謂相見好，同住難，同房之間既相處方法，同生活習慣既磨合，係好難得既體驗。有時夜晚瞓唔著，又可以搵宿友一齊傾下計；有時唔識功課，都可以好容易係宿舍搵到組爸媽指導下。」

「再加宿費，可能就要訓伍何曼原。」

面對來年加宿費，阿水實在難以接受：「真係加得太犀利。如果加左宿費之後，計過條數仲貴過搭車的話，我會考慮唔再住宿，因為真係無錢交宿費。必要時，唯有去朋友宿舍『屈蛇』，再唔係就訓圖書館同伍何曼原。」如此誇張？「無計架，根本就係學校逼我地架喎，可以點啫？」

崇基利樹培堂堂主 明仔

（分子生物科技二年級）

住宿除了減省交通時間，有助學習外，這個讓二三百名同學共同生活的空間，亦促成了不少深厚的人際關係。我們特意訪問了崇基利樹培堂堂主明仔，分享他於宿舍的生活。

家庭背景

明仔已是第二年入住利樹培堂（俗稱新宿）。當初住宿的原因很簡單，只因他是澳門人，只能住在宿舍，間中才回澳門。因此，他的大學生活實難以與宿舍分割。

但亦因他必需住宿，宿費便成為了一筆無法擺脫的款項。雖然家中暫時能負擔宿費，但明仔亦需借貸繳交宿費及學費：「其實萬幾蚊宿費對我屋企人來講，都好大負擔，如果再加落去可能會超出預算。而家屋企出一半，另一半就向政府借錢，畢左業出來再還。」

宿舍內的人際關係

明仔選擇於第二年上宿生會，除了因首年錯過傾莊以外，亦因為第一年感受到新宿的熱情：「喺上年感受到宿生會唔只係做莊務，仲係真心想認識你，而且我喺大學入面最好嘅朋友幾乎都喺新宿識，慢慢建立左對新宿嘅感情，今年想用另一個身份為宿生服務，等宿生體現到我上年感受到嗰份感情。」

談及於宿舍內難忘的經歷，竟是一次腸胃炎：「嗰次我腸胃炎痛到落唔到床，多得我層樓一班兄弟，五六個人夾手夾腳抬我上的士，帶我睇醫生，可以話係救左我條命。」

至於明仔覺得宿友最獨特之處，是大家於同一個空間生活：「大家朝夕相對，見宿友仲多過見屋企人，就慢慢會覺得班兄弟係每日唔可以或缺嘅部份，每日都要一齊做啲野，沖涼都要嗌埋一齊沖。」而他對宿友的生活習慣亦瞭如指掌。

眼界大開

明仔於宿舍內最大得著，除了找到一班知心好友外，還開闊了不少眼界：「宿舍入面有好多喺自己個系度遇唔到嘅人，好似我識好多哲學系嘅宿生，佢地諗法好特別，同佢地傾計，令自己諗法都改變左好多。新宿三百幾個宿生，如果我每晚同唔同人傾計，已經可以收集到好多平時接觸唔到嘅思想。」

此外，與宿工的交流中亦加深了對宿舍及書院歷史的認識：「一班宿工喺呢個宿舍經歷左好多年，睇到嘅多過我地好多。從佢地口中知道宿舍同大學隨住時代變遷，有咩唔同嘅變化，亦可以知道佢地對新一代大學生嘅睇法。」

「再加宿費，可能都唔再住喇。」

雖然明仔現時仍能勉強負擔宿費，但身邊已有朋友因宿費太貴而不再住宿，寧願選擇屈做非法蛇：「佢地梗係唔想屈蛇啦，間房又唔係好大，仲要屈一兩條蛇。啲蛇好多時鋪張被喺地下就訓架喇，個環境其實好唔理想。好似我間房都有條蛇，因為對新宿有感情，想參加傅盃，所以比錢做長蛇，但下年都可能因為宿費太貴而唔再住宿喇。」

那麼，我們可以做甚麼？

面對同學的大力反對，校方透露他們會考慮重新訂立新方案，但沒有承諾不再執行X+Y方案．遑論暫停加宿費。所以，同學實不能掉以輕心。

直至3月22日，現在已有超過2200位同學聯署，但這遠遠未足夠。要知道，越多人簽名，就越能施予校方壓力。未簽名的同學請踴躍簽名！已簽名的請呼籲各方好友聯署！

未來數星期，將會有不少與反加宿費有關的活動，如中大學生會正籌備公開論壇，介時會邀請沈祖堯校長出席。請各同學務必留意公佈。

請 like及share Facebook Page「反對無理加宿費！中大宿費關注組」，以讓更多人留意最新情況！