文/ 迪

2023年3月17日，《序弦》山城音樂節在新亞小百萬舉辦了。那晚，我前面有位男大學生聽住歌拿着啤酒，哭訴著自己剛剛失戀，我前後的觀眾一邊安慰他「下個更可愛」，一邊不時分飲他手中和放在地上的啤酒（我都有搭吓膊頭，但唔只係為咗啤酒）。漂CD、Album介紹、分享Playlist；有人Mosh到甩了隻鞋，然後大家大叫「邊個跌咗隻鞋！」同時繼續Mosh；臨完場朋友都上台插水了幾次，表演的樂手和主唱在演出後就落台同學生、觀眾撞成一片；完騷後很多觀眾去了光顧女工，那時我見到很多在校外睇騷時見過的熟悉面孔。

這是上屆我參與山城音樂節的回憶，一年半後我還是記得一些片段，不時回味。雖記憶朦朧，但我肯定那晚觀眾和表演者都能盡興。

序

今屆，大家引頸以盼的《生性》山城音樂節（下稱「山城」）會在九月二十日和聲書院LG2 Dinning Hall舉行。但想必大家都會好奇，為何這次會延遲，不像上屆在三月份的新亞小百萬舉辦？我訪問了五位今屆山城音樂節的搞手——Dennis，Wilson、Ivan、Woody、Jonathan；希望了解他們想通過舉辦山城延續的理念，在今屆籌備過程遇上的波折，還有經此一役後，對於未來的山城，中大內學生活動的思考。

山城音樂節是個學生自發組織的一夜音樂節活動，上屆搞手Wilson和今屆主席Dennis指，今屆山城承接往屆推廣本地獨立音樂的理念，籍免入場費及強調「自由定價」的形式，一方面希望吸引未接觸過香港獨立音樂演出的同學親身一試，同時讓觀眾付出自己心中感到值得、可負擔的價格支持音樂圈。

書院「揸正嚟做」——校外觀眾與觀眾紀律問題

2023山城《序弦》成功吸引到很多同學和校外觀眾的讚許，享譽香港獨立音樂圈，但可能在提供場地的新亞書院眼中卻是臭名昭彰。

至上屆2023年為止，山城仍是新亞書院屬下的學生活動，由新亞學生會提供資助。在籌備初期，搞手們希望照舊借用新亞的小百萬作今屆活動場地，但由於往屆觀眾紀律違反場地秩序的問題，遭到供應場地的新亞書院拒絕。2023年的山城搞手Wilson提到「其實上年我哋都有採取一啲措施，我有上台叫大家唔好食煙啦。都有寫一塊大牌，提醒吓大家唔好食煙啊，但始終係戶外場地，啲觀眾情緒到嘅時候好自然就⋯⋯發生咗。」

Dennis說，在申請今屆場地與院方交涉時，書院一開始便堅拒借出小百萬。書院職員提到上屆活動次日仍有煙味殘留在小百萬旁邊的人文館內［1］，Ivan續說：「聽職員呢啲事以往都有，甚至其實喺19年以前已經開始累積（惡名），所以書院一向都唔太中意呢個有大量校外人嘅活動。」Dennis補充書院拒絕的其他理據是認為「呢個活動唔單止唔係搞俾新亞學生，甚至唔係主要俾中大學生，咁呢個活動憑咩係用新亞嘅資助同場地？」，而書院拒絕批出小百萬的另一點理據則是，在騷前準備樂器和設備時校音及試音造成的噪音，無可避免會影響相鄰的人文館上課和誠明館辦公，而且亦會佔用作為主要通道的小百萬。

其實新亞書院亦曾提過可以批出新亞的圓形廣場給山城，但要求須到活動當天中午才能取得停車場的使用權；但搞手判斷時間不足以搭舞台和準備音響樂器，唯有放棄。之後Dennis曾打聽過某些新亞學生活動可以提早一晚使用停車場，多少質疑書院是對山城本身的態度影響了他們的待遇。

花果飄零 曲折離奇

至此已經是23年11月，他們知難而退，為了向其他書院或部門其他場地提出申請，唯有脫離新亞屬下活動的名義，以未正式註冊團體或者搞手所屬的書院樂隊名義再申請。

首先是聯合書院，但還是遇到類似問題，最終他們多次修改，再向學生會提交計劃書後仍然不果，感覺被書院行政程序拖延，只好再轉移目標。

再來已是4月將近Exam Period的時期，Woody等人去到崇基學院的辦公室提出活動申請，他們感覺崇基學的職員對活動比較開放，只是提出了「活動的籌備工作需要有崇基樂隊的參與」一個條件，Ivan笑說「可能山城個壞名聲未去到山腳嘅書院」，但最終因為樂隊同學對加入籌備工作的意欲不大，加上人手有限而遭到拒絕。

他們同期找到學生事務處（OSA），希望趕在暑假前舉辦。當時Dennis上到辦公室，一位職員幫助他們提交租用文化廣場的申請，更在當日便盛情引導他們熟悉申請場地的電源位。Dennis回憶「職員當時甚至話我哋搞騷嗰日係禮拜日，就算嘈啲都唔洗驚。」但弔詭地，後來同一位職員口風急轉彎——「嗰日係禮拜日，所以唔Book得。」Dennis續說「咁我再改Book禮拜六；再之後係話我哋唔可以用某書院樂隊名義，因為我哋唔夠多個書院樂隊嘅人。到後來佢冇覆email，就算數唔再搵佢。」

曾在英國大學讀書，研究香港獨立音樂的音樂人類學博士學生Jonathan［2］提起在英國大學搞騷的情況，失笑地說「其實佢哋（該英國大學）好簡單嘅，佢哋想Book場搞個騷，係有個Online system去Book場嘅，咁佢哋就要牽涉一啲”Health and Safety”嘅要求，有曬一個list咁逐個剔，例如如果係場地有限制人數，咁可能就搵個糾察喺度負責數出入人數；如果太多Speaker啲聲太大，怕啲人會聾，咁就喺門口擺一大樽耳塞，攞就攞、唔攞就係個人嘅事⋯⋯咁總之剔曬所有嘢，全部要求就滿足曬，咁就已經可以搞。」

幾經波折 生性回歸

山城的戰勝歸來是反高潮的。4月底Dennis在因緣際會間去了一場「考試加油站」［3］炸雞聚會中遇見和聲學生會的柏豪，很自然地談到山城的場地困阻，適逢柏豪對香港獨立音樂亦有熱誠，便做了書院和山城搞手間的推手，而且和聲書院方亦希望有更多活動讓走讀生對書院有更多歸屬感，於是亦願意提供場地，幾乎一拍即合。最終竟然是在一餐炸雞推動下，他們回來了。

Wilson回想2023年山城的時間背景，上屆山城恰巧遇上強制口罩令剛剛撤銷［4］，情況好比鬆開勒緊太久的橡筋。「再加上嗰陣20年到22年都冇搞到山城，冇前人交接啲嘢（注意事項），而我哋又對食煙問題唔敏感，冇意識到可以咁失控，（冇表明到嚴禁吸煙）導致有少少破窗效應咁，開始咗就大家都一齊食，我哋圍內都唔注重，所以呢個位其實係要認錯嘅。今年其中一個關鍵位係我哋內部應該要強硬啲」Dennis接着說「出面好多騷其實都係咁，都會話唔俾帶酒，會搜袋，Clockenflap都搜袋，我哋都係要強硬啲。」他幽了一默——「邊個食煙，就大鳩佢『我哋唯有同中大保安合作！』」

經此一役，他們將今屆2024山城活動定名為《生性》；見過鬼也會怕黑，「生性」也是希望保護山城音樂節能夠延續下去。

獨立音樂曝光

「感覺好嘈。」Woody曾問過新亞院長怎看待上屆的山城，記得當時院長第一時間的反應如是。「可能喺大部分管理層、職員眼中單純覺得呢個係製造噪音嘅活動，唔知咩嚟。」他說。相信這類印象也在反映社會大眾和獨立音樂圈之間的關係縮影。

Wilson形容推廣獨立音樂像要面對一個隔離不同類型樂迷的Bubble，難以突破。主流音樂與獨立音樂的樂迷各有各玩，主流音樂的樂迷尤其少有機會欣賞到另類的音樂。但他相信總有個突破位——「幾時人會知道獨立音樂騷嘅價值？就係當佢哋喺Live Show Feel過先知！」

「喺疫情之前， 香港八大嘅Band Soc都會各司各法搞自己嘅Anunal Performance」，AP除學生樂隊演出外，亦會邀請校外其他獨立音樂單位，「呢啲大大小小嘅騷對香港indie文化好重要，但喺疫情之後，好多學界Band Soc已青黃不接，呢個喺大學搞騷嘅角色好似交曬俾UNISON［5］，另外消費習慣改變等等，咁呢件事就冇咗。」Wilson談起他所見大學獨立音樂Scene的變化。

他在思考如何讓人聽到更多音樂，想像以前的校園Band Soc文化「佢哋可以喺校園用一個較低嘅價錢俾同學睇到騷，成件事係⋯⋯比較兜踎啲，但正正係喺大學生呢個夾心階層、黃金時機先可以做到。」而現在山城能夠重新擔當這一角。上屆有不少觀眾聽到《宇宙幽靈》演出後反應很好，「原來，好多觀眾係因為山城而認識《宇宙幽靈》，然後再認識到其他音樂，知道『原來獨立音樂唔一定係轟轟轟』。」

他續說：「呢種Vibrancy係山城可以提供到，體現喺我哋嘅Line up、自由定價理念。所以山城點解咁重要？佢某種意義上免費，喺中大，一個唔係專For搞騷嘅校園搞騷，喺小百萬呢啲日常經過嘅空間，咁會接觸到多啲街客（圈外人）同埋中大學生；好多時冇聽開嘅人好難接觸到坊間有咩Indie騷嘅場地，其實係一種成本。」Jonathan亦想起上年的觀察，儘管音樂的風格多元有異，大部分觀眾亦會聽完整場騷，很少聽完某隊樂隊表演完便中途離開。這與很多校園音樂演出的狀況不同。

大學獨立音樂Scene（場景）的文藝復興 ［6］

因為研究題目，負責聯絡的Jonathan本身認識不少獨立音樂圈的樂手。學生組織預算有限，一般都有學生價。Jonathan提起今年與樂隊洽談演出費用時說，「當我介紹咗我哋係山城，解釋我哋係學生組織，預算唔多；有啲樂隊當聽到係山城時說：『如果係你哋嘅話我哋其實冇所謂，最緊要大家玩得開心』。」這讓他們相信很多樂隊都很認同山城的價值。

「我同有嚟過山城音樂節嘅樂手朋友、觀眾傾偈，當佢哋知道我係同今屆山城有關，佢哋都會好直接咁話『上次嚟咗，係好撚正啊』；唔淨止個演出Line up，唔淨止個場地；唔係Hardware上，而係Software上嘅一種『正』。」Jonathan記得朋友曾說上屆山城有一種「想當年」大學Band騷一樣嘅感覺。而當年和現在的校園騷是很不同的，他形容那時”DIY”好多，而演出樂隊的風格也更加多元。

他回想有些圈中人可能原本會覺得近年大學在樂隊發展上大不如前，但來到山城就會驚喜，或者至少能感到希望，相信未來仍有年輕人會繼續走上這條獨立音樂圈的路、接這個棒，未來亦會有更多對不同音樂類型接受度高的獨立音樂樂迷；他身邊的樂手朋友總對中大有種印象——這裡有很好的文藝活力底蘊，形容那是種累積而成的”Legacy”，「要令呢啲Legacy維持、傳承到，就需要我哋呢種活動。但當然呢啲事，喺校方角度未必可以見到或理解得到。」Jonathan緩道。

結？ —— Vibrancy & Legacy

我最後問起大家對現在中大的學生活動、組織的想法，而這個環境和當初自身期望的有沒有落差。

Dennis答我「原來畀我想像中好啲。我入學前以為，因為中大學生會摺咗，所以咩都冇咗。但當我入學後接觸到啲人；雖然報社（中大學生報）冇咗，但班友仲喺度，雖然狀況好頹，但至少我哋而家都俾你訪問緊。」Wilson接著說：「冇咗Title，大家仍然喺某個位置默默做嘢。」

入學時抱著中大人文精神想像的Woody說，「雖然入學前都預計氣氛會有啲差，但冇諗到會咁差。我接觸、觀察到嘅同學大多都比較個人化，好多都想快手畢業就算，可能大家目標唔同。」因為人文精神的印象，他想像中的中大人會為了集體的目標共同拋灑熱血，但Woody觀察到這樣的中大人並不多。

正在Band Soc的Ivan說自己也感到些失望：「我接觸過唔同Band Soc，發現中大大部分Band Soc成員只期望自己夾Band出騷；好少考慮搞騷同搞樂器班去幫助獨立音樂圈同服務會員。而好多其他莊都開始掛住飲酒，或者只為宿分，娛樂化咗。」

「未入山城前，我一向對『上莊』嘅印象都係比較浪漫主義、熱血，唔係期望有回報嘅事。聽大家講完先知道好多莊都唔係咁。不過我都有Observe其他莊，似乎好多莊都唔使遇上咁多麻煩，可能只係搞開sem飯同燒烤，佢哋搞Sing Con都幾順利⋯⋯年年都可以用到同一個場。當我繼續同呢班小朋友相處時，更加覺得外界嘅人對山城的印象係啱——山城的確傳承到一種對獨立音樂嘅熱情」Jonathan說。

「好多時做呢啲事係要由理念驅使，但無端端理念邊度會嚟？上莊文化嘅根本在於『過莊』，其實Freshmen都係白紙一張，好多時係當你聽同見到前人嘅說話同行動、付出，先能夠感受到呢啲理念嘅意義。大家能夠親身感受，先傳承到落去。」Wilson說。校園經過疫情數年，而且很多學生組織現在需面對更多限制，當後來者無法看見前人的腳印，不同的學生組織都遇到經驗和理念傳承的斷層。斷層之後，對「如何實踐理念」的想像少不免會消褪。

「就算好彩咁有一班人想做事，都可能會遇上好多限制，譬如搵唔到場地、資金。長遠咁睇團火總會慢慢消退，由有火變得冇咁有火。雖然我哋係可以自主決定做啲咩事，但我哋始終需要配合校方行政嘅要求先實行到。」Ivan說。今屆有莊員在籌備過程時淡出，或者大家心中都總有團火，只是沒有料到搞這場騷需要拖到延長賽。

大家都希望，大學是個「Trial and Error的安全網」、「最後的青春時刻」。在這裡也會遇上滿懷熱誠和想像的同伴，而且尚有各種資源。有些事在大學裡做，會比社會有更多空間。「正因為某種意義上，我哋擁有學生紅利，試錯嘅成本冇咁大，先容許到山城可以嘗試多啲理念嘢。如果理想地，大學行政上對學生活動足夠supportive，畀學生可以嘗試好多事，就會有好多Magic happens⋯⋯」 

「例如係上年嘅山城。」Wilson笑說。

Q:個人嚟講，大家其實點解想搞山城？

—- 1

Ivan: 希望可以幫手搞到場騷，推廣到一啲我聽開嘅Genre，亦都籍機認識我冇聽開嘅音樂類型。

—- 2

Woody：我純粹係因為啲人講大學五件事⋯⋯（大家：wtf？）Asso兩年齋認真讀書有啲苦悶，入到大學想搵啲世藝搞，搞騷呢樣都係我感興趣嘅事。平時做觀眾睇騷都可能唔少，但搞手嘅角度未試過。試吓做搞手，睇嘢會全面啲。大學生咩都試吓囉。

—- 3

Wilson：其實好純粹。係因為好玩、好聽，想自肥搞俾自己睇。會有分享慾嫁嘛？當自己感受到啲正嘅嘢——「點解？竟然冇人識嫁！？」。我亦都係因為搞山城令我人生有啲新諗法。

簡單嚟講，中大值得擁有，我因為音樂而人生變得美好！我要令其他人都感受到呢種美好！

—– 4

Dennis：我係受到Wilson影響，睇住佢上年搞山城，都聽咗好多佢嘅諗法同理念，我幾認同，所以今年就去做呢件事。

其實一開頭我係冇去傾莊嘅，猶豫要唔要去做，因為睇住佢上年做得幾辛苦，所以廢事「揦屎上身」。但後尾我覺得—如果我唔參與呢件事會後悔，我都想呢件事能夠發生。

咁嗰時因為要有新亞學生做President，我個Title就由節目部部副變咗做掛名P，其實我都知道嗰陣奶嘢，但我都想呢件事發生，咁就做囉。

（Jonathan：所以我都要讚揚你嘅，本身掛名，但其實都好initiative去同大家傾、開咗好多會，真係嘅。（大家鼓掌：好嘢) ）

（Dennis: 好開心-,-） 

—- 5

Jonathan：

一嚟我要做功課，咁我要寫論文啦。其實唔知大家點諗我嘅角色？我驚我不停潑大家冷水。

(Ivan：講真，好多表演單位都係靠你畀contact，好多位你都有經驗啲同畀到意見，好似有個上莊嘅角色咁可以問。)

Jonathan：一方面我想Observe而家年輕一代搞騷時嘅構思、宣傳、溝通合作，過程背後嘅Value。不過我自己其實一直都想搞騷，以前都只試過喺屋企搞過一啲騷同做過協助嘅角色，但未真正試過做籌備Band騷嘅決策角色。因為我哋音樂人類學嘅研究方法”Participant observation”，而家我就又participate又有Observe。

另外我都有嚟上屆山城，我喺外國讀U，對於以前冇經歷過嘅大學獨立音樂scene嘅reputation都有種憧憬 。所以想透過籌備山城，體驗一次喺呢個時代搞大學scene嘅騷。亦都想俾到一個觀眾、表演樂隊，同佢地（山城搞手）好嘅experience。

——-

［1］：編按:「大家記得唔好食煙隊草啊，抽煙BAD！」

［2］：Jonathan亦有經營一個叫做「講indie」的Podcast，簡介是「一班對香港indie有興趣嘅學者用人話講嘢。」

［3］：「考試加油站」是由和聲學生會舉行的一個Exam Period打氣活動，派炸雞「每人限取兩件」。

［4］：強制口罩令於2023年3月1日撤銷。

［5］：UNISON是一個會在香港大專舉辦獨立音樂節巡演的團體、機構。

［6］：獨立音樂Scene指由表演者、場地供應者、觀眾、騷搞手等分享共同音樂品味的持分者組成的共同體的獨立音樂生態。

分享至:

Leave a Reply

Your email address will not be published.